Osservatori Regjonâl de Lenghe e de Culture Furlanis

La grafie uficiâl de lenghe furlane
cun
La lenghe comune e lis variantis
I criteris gjenerâi di normalizazion dal lessic
La toponomastiche dai paîs furlans

Presentazion

Cul Decret dal President de Zonte de Regjon Autonome Friûl-Vignesie Julie dai 6 di Novembar dal 1996, daûr dal art. 13 de L.R. 15/96, la lenghe furlane e à vût la sô grafie uficiâl. E je stade sielzude la propueste di grafie decretade ai 15 di Lui dal 1986 dal Consei de Provincie di Udin, in cunvigne cu lis Provinciis di Gurize e di Pordenon. La grafie e je stade elaborade dal prof. Xavier Lamuela, incjariât de stesse Provincie di Udin, su indicazion de Comission pe grafie istituide cun chel fin. La Comission, cjapade in esam la cuistion tal so complès, e veve fatis diferentis propuestis di presentâ al prof. Lamuela, che al veve di fâ une sielte par rivâ a un sisteme coerent plui che al jere pussibil. La Comission e jere componude di: Adrian Cescje (president), Silvana Fachin Schiavi, Giovanni Frau, Amedeo Giacomini, Aldo Moretti, Gianni Nazzi, Etelredo Pascolo, Nereo Perini, Giancarlo Ricci, Piera Rizzolatti e Eraldo Sgubin.

Il prof. Lamuela al sielzè un sisteme grafic cjapant a riferiment chel doprât de Societât Filologjiche Furlane, elaborant intal stes moment une propueste leade a un model di lenghe normalizade, chê de tradizion leterarie dal Friûl centrâl o lenghe comune.

Daspò dal Decret dai 6 di Novembar dal 1996, l’Osservatori Regjonâl de Lenghe e de Culture Furlanis e la Societât Filologjiche Furlane, inte Sierade dal 1997, a àn cjatât un acuardi suntune modifiche dal sisteme decretât pe sostituzion dal digrame «ts» a inizi e in cuarp di peraule cul segn «z» e pal ûs dal segn «q» intai toponims o antroponims storics tant che «Aquilee» o «Quarin». Il sisteme grafic uficiâl de lenghe furlane, cun cheste modifiche, al è stât votât inte Vierte dal 1998 tant che emendament de L.R. 15/96 dal stes Consei de Regjon. Cun chest at la lungje cuistion de grafie de lenghe furlane e je sierade e cumò i Furlans di ogni dontri a àn l’imprest par scrivi la lôr lenghe par judâle a cressi e a rinfuarcîsi.

Al è dal sigûr impuartant che i Furlans a conservin lis lôr fevelis locâls, lis lôr variantis, intai rapuarts informâi o pe espression poetiche, ma ancjemò plui impuartant al è che a imparin a doprâ la lenghe comune soredut intai rapuarts formâi, intal scrivi, pe prose e pai messaçs che a àn par distinataris ducj i Furlans.

L’Osservatori Regjonâl de Lenghe e de Culture Furlanis
 

 Ortografie gjenerâl

Alfabet

2. Cemût scrivi la lenghe comune o koinè

Par scrivi une peraule in maniere corete, bisugne cognossi i suns de peraule intal furlan comun. Cui che al fevele une varietât diferente de lenghe comune fin cumò al podeve judâsi consultant il vocabolari di Giorgio Faggin (Vocabolario della lingua friulana, 2 vols., Udin, Del Bianco, 1985), no par seguî la forme grafiche, che no je chê uficiâl, ma par vê une vuide pai suns: al bastave trascrivi i segns grafics doprâts di Faggin inta chei de grafie uficiâl.

Cumò però a son a disposizion il Dizionari ortografic e il Coretôr ortografic preparâts de Cooperative di Informazion Furlane tal 2001, che a dan i lemis e lis peraulis te version normalizade.

3. Ûs di cj, e di gj

Il sun postpalatâl sort e sonôr, che nol esist par talian, si lu scrîf cui digrams «cj» e «gj»; il segn «cj» si lu conserve intîr ancje in fin di peraule (il sun postpalatâl sonôr nol esist in fin di peraule).

Postpalatâl sort:

1. cjan, cjoc, pacjuc, picje, cjiche, bocje, cjalçut, cjamp, cjatâ, moscje.

2. ducj, cuancj, tancj, chescj, triscj, grancj, tocj, parincj, vincj.

Postpalatâl sonôr:

1.  gjat, gjonde, gjube, gjenar, filologjic, spongje, ingjustri, gjal, Gjigji.

4. Ûs di ci, ce, ça, ço, çu, ç e zi, ze, za, zo, zu (sorts)

Il sun africât palatâl sort (il sun des peraulis talianis cinema, cena, lancia, lancio, ciurma) si lu scrîf par furlan «c» denant di i, e e «ç» denant di a, o, u o in fin di peraule:

• cine, cise, cene, place, çavate, plaçâl, çoc, çuc, piçul, provincie, societât.

• bêçs, peç, leç, laç, braç, glaç, baraç, palaç, poç, sangloç, spiç, vidiç, riç.

Il sun dentâl sort (il sun des peraulis talianis lezione, pazienza) si lu scrîf par furlan «z» in cuarp di peraule o par peraulis forestis:

• lezion (dal lat. LECTIONEM), stazion (dal lat. STATIONEM), esercizi (dal lat. ESERCITIUM), vizi (dal lat. VITIUM); Svuizare, zucar, gulizion, spazi, graziis, pazient.

Lis peraulis che a finissin in -ance, -ence, -ince, -once, -unce a mantegnin il c:

• bondance, impuartance, pazience, riverence, pinitince, presince.

5. Ûs di zi, ze, za, zo, zu (sonôrs)

Il sun africât palatâl sonôr (il sun des peraulis talianis gita, gennaio, giallo, gioco, giunco) e chel africât dentâl sonôr (il sun des peraulis talianis zoo, zero) si ju scrîf par furlan «z»:

Africât palatâl sonôr:

• Zenevre, zinar, sielzi, Zenâr, zes, zâl, bielzà, zovin, zonte, zûc, zumiele.

Africât dentâl sonôr:

• zoo, zodiac, zenit, zero, azimut.

6. Ûs di s, di ’s e di ss

Il sun fricât-sibilant sort (il sun des peraulis talianis silenzio, sedia, sale, sole, consumo, stagno, rosso, cassa) si lu scrîf par furlan «s» in principi o in finâl di peraule e denant di consonante sorde:

• sivilot, sisile, seglot, sente, sâl, sante, sope, soste, sunete, suste.

• lûs, pas, bas, al larès, ros, capìs, lapis.

• stazion, paste, pueste, sposte, baston, liste, buste.

Si lu scrîf «ss» tra vocâls:

• pussibil, bussul, cosse, massarie, passon, passût, tasse, musse, pessut, messe, stesse.

Si lu scrîf «s» intal câs di un pronon riflessîf tacât daûr dal infinît dal verp e intal câs di composizion verbâl:

• fevelâsi, viodisi, riferîsi; risuelâ, risunâ.

Par furlan si scrîf il sun fricât-sibilant sonôr (il sun des peraulis talianis rosa, mese, cosa) «s» tra vocâls e «‘s» in principi di peraule (intai pôcs câs che il sun al è sonôr):

• pesâ, muse, tasê, preseât, rose, adasi, cusî, asin, oresin, resint, casot, pesut.

• ’Sese, ’Sef, ’seminari, ’save.

7. Ûs di j e di gn

Il sun semivocâl palatâl (il sun des peraulis talianis iena, ieri, aiola) si lu scrîf par furlan «j» in principi di peraule e «i» in cuarp o in finâl di peraule:

• joibe, justizie, Jacum, jet, jerbe.

• mai, Buie, puiûl, paiâ.

Cuant che une peraule scomençade di «j» si à di scrivile tacade daûr di une altre, si conserve «j». In particolâr, «j» si lu conserve intai pronons che si tachin daûr di une forme verbâl:

• Jerbe/disjerbâ.

• ju cjali: cjalâju, cjalaitju; jal scolti: scoltâjal, scoltaitjal.

Il sun nasâl palatâl (il sun des peraulis talianis stagno, gnocco) si lu scrîf par furlan «gn», fasint però atenzion a chês peraulis che a alternin une forme cun «n» e cun «gn»:

• gnot, gnerf, cognon; stagn, stagnâ; ragn, ragnut.

• disen ma disegnut; pan ma pagnut; len ma legnam; an ma agns; bon ma bogns.

8. Ûs di «cu» e «qu»

Il sun velâr sort denant di «u» si lu scrîf par furlan simpri «c», fûr che intal câs di nons storics furlans, di lûc o di persone, là che si lu scrîf «q»:

• cuadri, cuant, cuâl?, cuindis, cuote.

• Aquilee, Sant Quarin, Marquart, ma Cuals, Cuiniis.

Si conserve «q» intes peraulis forestis:

• quiz, moquette.

9. Altris câs

1. Denant di diftoncs scomençâts di «u», e di «u lunc» iniziâl che in altris varietâts al devente «ou», si met la letare «v».

• vuardie, vuarfin, al vûl, vuere, vueit, vueli, vuicâ, vuide.

2. Fra «a» tonic e «a», «e», «o» atons e fra «o» tonic e «e» aton si scrîf «i» che in cualchi varietât al comparìs inte pronunzie ma inte lenghe comune al reste mut.

• fertaie, maie, paie, maiute, fevelaraio, ploie, roie, voie.

3. Inte grafie no si rifletin lis alterazions de pronunzie di une peraule intes posizions che e cjape intal discors

• Cuant?: si sint il «t», che al è pronunziât;

• cuant che tu vegnis: no si sint il «t» inte pronunzie, ma si ’ndi manten la scriture.

4. Chei altris suns de lenghe comune si ju scrîf doprant lis letaris che si doprin ancje pe lenghe taliane.

10. I acents

L’ûs dai acents, che a son chel curt (“ ` ”) e chel lunc o dopli (“ ^ ”), al è limitât ai câs segnâts ca sot.

10.1. L’acent curt

L’acent curt si lu met intai câs segnâts ca sot.

1. Peraulis che a finissin par vocâl
  Se la peraule polisilabe e finìs par vocâl cul acent tonic, si metii sore l’acent curt:
  al pensà, tribù, Grivò, ma: jo, tu, po, salet, pessut.

2. «-in» desinence verbâl
  Su la desinence verbâl «-ìn» de prime persone plurâl si met l’acent, baste che la peraule e sedi polisilabe.
  Su altris peraulis che a finissin par «in», ma che a son monosilabichis o no son verps, no si met l’acent:
  nô o mandìn; sù, partìn, ma: o lin, cunin, taulin, panin, morbin.

L’acent si conserve tal câs di postposizion di un pronon a lis formis de prime persone plurâl dal verp:
nô o cirìn: cirìno noaltris?, cirìnju, cirìnlis.

3. Finâls par «ìs», «ès», «às», «òs», «ùs»

Se la peraule e je polisilabe e la silabe finâl acentade e finìs par «is», «es», «as», «os», «us», si segne l’acent curt. Se e je monosilabe, no si met acent:
o patìs, catùs, al larès, ma: pas, mus, çus, tos, fis.

4. Acent curt su peraulis che si somein

Par distingui ciertis peraulis monosilabichis di altris compagnis di pronunzie, ma diferentis di significât, suntune des dôs si segne l’acent curt. Bisugne imparâlis a memorie.

e	tu e lui	è	lui al è
a	a ti	à	lui al à
an	al è sucedût chest an	àn	a àn sêt
di	di cui? di te	dì	il dì e la gnot
si	si scolte	sì	sì, lu vuei
su	su la taule	sù	monte sù su la taule
ju	ju cjatais	jù	vait jù de taule
la	la scuele	là	vait là e no ca

5. «ì» e «ù» tonics daspò vocâl

Par judâ la pronunzie al è util scrivi l’acent su «i» e su «u» tonics che si cjatin daspò di une vocâl, se la pronunzie e intint di distacâ lis dôs vocâls:

aìne, caìe, criùre, liùm, ma: sium.

10.2. L’acent lunc o dopli

L’acent lunc o dopli si lu met intai câs segnâts ca sot.

1. Acent lunc par silabis di valôr gramaticâl

Si met l’acent lunc su

• infinît de prime, seconde e cuarte coniugazion: cjantâ, podê, cirî.

• participi passât regolâr: cjantât, podût, nassût, cirût, colpît.

• secondis personis plurâls dai verps, se a puartin l’acent: voaltris o plasês, o viodês, o cirîs.

2. Acent lunc in silabe lungje

Si à di cognossi la forme standard de peraule e di ricognossi la lungjece de vocâl toniche:

• Nâs, podê, pinsîr, mês, pês (tal. peso), pôc (tal. poco), morôs, lûs, corâl.

Denant di «r» finâl di peraule no si scrîf l’acent lunc cuant che la pronunzie no je lungje intes variantis dal furlan che a àn lis vocâls lungjis; in câs contrari si lu scrîf.
Cuant che no rive la pratiche, si judisi cul vocabolari.

• Noglâr, fedâr, palîr, vulintîr, pitôr, sunsûr, madûr.

Se la peraule e fâs part di une famee di peraulis là che a comparissin altris consonantis daspò di «r», par esempli «r», «m» o «n», o altris consonantis si lis cjate inte peraule latine o taliane che a àn la stesse lidrîs, alore no si segne l’acent su la silabe de «r».

• cuar (frl. scuarnassâ); for (frl. fornâr)

• cjâr (tal. caro) / cjar (lat. carrus, tal. carro); al cor (lat. currere, tal. correre); tor (lat. turris, tal. torre)

3. Acent lunc in cuarp di peraule

In cuarp di peraule no si segnin i acents luncs, fûr che in chescj câs:

• te peraule «pôre»

• cuant che la peraule e je componude di un infinît dal verp o di une seconde persone singolâr e plurâl:

 puartâ, puartâlu, puartâsi; voaltris o crodês, crodêso?; tu tu âs, âstu tu?.

4. Valôr distintîf de vocâl lungje

A son peraulis monosilabichis che a mudin di significât secont che la vocâl e je lungje o curte; bisugne segnâ l’acent lunc par distingui il significât:

to (tal. tuo) / tô (tal. tua); so (tal. suo) / sô (tal. sua); no (tal. non) / nô (tal. noi); che (tal. che) / chê (tal. quella).

 

11. L’apostrof

L’ûs dal apostrof al segne la colade di une part de peraule. Buine regule e je chê di doprâ l’apostrof mancul che si pues, lassant il plui pussibil interiis lis peraulis; si pues doprâlu intai câs indicâts ca sot.

1. Apostrof cun «lu»

Daspò dal articul definît masculin singolâr, se la peraule e scomence par vocâl, si met par solit l’apostrof : «l’»

lu arbul e l’arbul; lu ûf e l’ûf; ma il soreli, il batecul.

2. Apostrof cun «indi»

Il pronon «indi» al piert l’«i» iniziâl daûr dal averbi «no» e dai pronons atons «o», «tu», «a»,«e»,«mi»,«ti»,«i»,«si», e lu sostituìs cul apostrof.

Si à par solit                     indi            ‘ndi

denant di une vocâl            ind             ‘nd

denant di une consonante   int             ‘nt

1. Indi sielç o int sielç (forme complete): no ‘ndi sielç o no ‘nt sielç; indi ai o ind ai (forme complete): no ‘ndi ai o no ‘nd ai.

3. Apostrof cun «che» e cun «la» articul

«Che» al à dispès daûr peraulis che a scomencin cun vocâl, soredut i pronons personâi. Ancje l’articul «la» al à dispès daûr peraulis che a scomencin cun vocâl. La elision si lasse ae pronunzie e la peraule si scrîf interie.

1. Intant che o cjantavin; ce che al è al è; la acuile dal Friûl.

12. Peraulis unidis e peraulis distacadis

Lis peraulis in gjenerâl si lis scrîf distacadis. Si lis unìs in composizion dome in câs specifics.

1. Câs specifics

«cuntun», «suntun», «intun»

cuntune legnade, inte place, suntun arbul

«cetant»

Cuant che i adietîfs e i pronons indefinîts a son componûts di doi elements, e il prin nol à flession e il secont le à, si ju tache. «Ce», par esempli, nol à flession, al reste compagn tal masculin e tal feminin, par singolâr e plurâl; «tant» al à flession, e al fâs: «tante», «tancj», «tantis»: inalore si ju tache cuant che a son dongje: «cetant», «cetante», «cetancj», «cetantis»:

cetancj che ti scoltin! ogniun al voleve fevelâ.

Ma «dut» al à flession, «dut», «dute», «ducj», «dutis» e cussì si à:

ducj cuancj mi cirin.

«pardut», «distès», «intun»

I averbis che a son formâts di une preposizion e di un pronon indefinît, un averbi o il numerâl «un», «une», si ju scrîf unîts:

ven incà; al podarès jessi pardut; met adun; o racuei intun.

«denantdaûr»

Cuant che si àn averbis e verps simii in sucession, si ju scrîf unîts:

al è dut sotsore; al va denantdaûr; o ai vistîts gjavemet.

«salacor»

Cuant che i elements che a varessin di formâ l’averbi a presentin alterazions, si ju scrîf tacâts:

salacor tu tornis; al veve bagnât dulintor.

«passantdoman»

I averbis che une lôr part e je un non si ju scrîf tacâts:

tal dopocene o studii; passantdoman o partìs; o ai un sotet.

A son peraulis che si lis sint in forme unitarie, e a son fatis di doi elements; si à di imparâ a scrivilis cemût che a son, un pôc a la volte. La regule e vâl ancje pes lôr variantis.

adore, aduès, almancul, ancjemò, apont, benzà, bielzà, cemût, cetant, cundut, dabon, dassen, daurman, dibant, dibot, dutun, framieç, impen, insom, lafè, parcè, parom, pluitost, purnò, purpûr, pursì, …

2. La liniute

Si dopre la liniute par tacâ dôs peraulis cuant che la union no je abituâl e cuant che lis peraulis componudis a son formadis di tiermins une vore espressîfs:

al è un colôr blanc-neri; al lavoruce a spicigule-minigule.

13. La scriture des varietâts

Lis regulis gjenerâls pe scriture dal furlan standard a valin ancje pe scriture des varietâts: ognidun al podarà lei ancje daûr de pronunzie de sô varietât. Lis varietâts però a puedin vê suns speciâi che no son cognossûts tal furlan standard. In chescj câs, soredut se si intint scrivi etnotescj, contis popolârs te reâl pronunzie dal lûc, ma ancje poesiis o altris tescj cun valôr documentari, si pues doprâ segns gnûfs, come indicât ca sot:

– pal sun interdintâl sort si dopre il digram th; par esempli, il furlan ocidentâl thoc = çoc in lenghe comune;

– pal sun interdintâl sonôr si dopre il digram dh; par esempli, il furlan ocidentâl dhovâ = zovâ in lenghe comune;

– pal sun sibilant palatâl sort (tant che il talian scena, sciagura)

in posizion iniziâl si dopre il digram sj; par esempli, il cjargnel sjivilâ = sivilâ in lenghe  comune;
in posizion mediane si dopre ssj; par esempli, il cjargnel messjedâ = messedâ in lenghe comune;
in posizion finâl si dopre sj; par esempli il cjargnel sing. il ros, plur. i rosj = plur. i ros in lenghe comune;

– pal sun sibilant palatâl sonôr (tant che il francês jour)

in posizion iniziâl si dopre ‘sj; par esempli, il furlan ocidentâl ’sjave = ’save in lenghe comune;
      in posizion mediane si dopre sj; par esempli, il cjargnel lusjôr = lusôr in lenghe comune.

Par facilitâ la pronunzie dai grups di vocâls carateristics di cualchi varietât cjargnele e ocidentâl, si consee di meti l’acent tonic su la prime vocâl, par esempli professùar = professôr in lenghe comune, nìaf = nêf in lenghe comune, jùa = jo in lenghe comune.

Il sun sibilant palatâl sort si lu scrîf semplicementri cul segn s, ancje se si trate di une scriture di variante dal furlan, cuant che al è denant di consonante e nol à valôr distintîf. Si scrîf cueste e no cuesjte, ancje se il sun al è palatâl.